बाबा सिद्दीकी यांची गोळ्या झाडून हत्या 

कुर्ल्यात भाड्याने राहून आरोपी करत होते रेकी, पोलिसांच्या चौकशीत महत्त्वाचे खुलासे

नवी मुंबई : राष्ट्रवादी काँग्रेसच्या अजित पवार गटातील ज्येष्ठ नेते तथा माजी मंत्री बाबा सिद्दीकी यांच्यावर काल (ता. १२) मुंबईत अज्ञात हल्लेखोरांनी गोळ्या झाडल्या. यात ते गंभीर जखमी झाले. त्यांना उपचारासाठी लीलावती रुग्णालयात दाखल करण्यात आले. मात्र, उपचारापूर्वी डॉक्टरांनी त्यांना मृत घोषित केले.

तीन अज्ञातांकडून गोळीबार 

सिद्दीकी हे काँग्रेसमध्ये अनेक वर्षी कार्यरत होते. ते काँग्रेसकडून तीन वेळा आमदार व विलासराव देशमुख मुख्यमंत्री असताना त्यांच्या मंत्रिमंडळात मंत्री होते. आठ महिन्यांपूर्वी त्यांनी राष्ट्रवादी काँग्रेसच्या अजित पवार गटात प्रवेश केला होता. मंत्री सिद्दीकी हे मुंबईतील खेरवाडी सिग्नलजवळील आमदार झिशान सिद्दीकी यांच्या कार्यालयाकडे जात असताना त्यांच्यावर तीन अज्ञातांकडून गोळीबार करण्यात आला होता. या हल्ल्यात त्यांचा मृत्यू झाला. या प्रकरणी निर्मल नगर पोलिसांनी दोन जणांना ताब्यात घेतले आहे. यातील एक आरोपी हरियाणा तर दुसरा उत्तर प्रदेश इथला असल्याचे समजते.

तिसऱ्या आरोपीची ओळख पटली असून त्याच्या शोधासाठी छापेमारी सुरू असल्याचे पोलिसांनी सांगितले. मीडिया रिपोर्ट्सनुसार, आरोपी कुर्ला येथे भाड्याच्या घरात राहत होते आणि गेल्या अनेक दिवसांपासून बाबा सिद्दिकीची रेकी करत होते, असे पोलिस तपासात समोर आले आहे. या हत्येसाठी आरोपींना प्रत्येकी 50 हजार रुपये आगाऊ देण्यात आल्याचे पोलिसांनी सांगितले.

'गृहमंत्र्यांनी राजीनामा द्यावा'

बाबा सिद्दीकी यांच्या मृत्यूबाबत काँग्रेसचे ज्येष्ठ नेते विजय वडेट्टीवार म्हणाले, गोळीबार करणाऱ्यांना अटक करण्यात आली असून पोलिस त्यांची चौकशी करत आहेत, मात्र आज गुन्हेगार मुंबईत मोकळे फिरत आहेत आणि कोणावरही हल्ला करत आहेत. सत्ताधारी पक्षाच्या नेत्याची हत्या झाल्यास सर्वसामान्यांच्या सुरक्षेचा प्रश्न निर्माण होतो. मुंबई पुन्हा क्राइम हब बनणार का? महाराष्ट्र उत्तर प्रदेश आणि बिहारच्या मार्गावर आहे का? गृहमंत्र्यांनी राजीनामा द्यावा, मुंबईत ज्याप्रकारे गुन्हे वाढत आहेत, त्यांनी राजीनामा द्यावा.

सलमान खानच्या घरी सुरक्षा वाढवण्यात आली आहे

बाबा सिद्दीकीच्या हत्येनंतर चित्रपट अभिनेता सलमान खानच्या घराबाहेर सुरक्षा व्यवस्था कडक करण्यात आली आहे. बाबा सिद्दीकी आणि सलमान खान हे मित्र होते आणि ज्या लॉरेन्स टोळीचे नाव बाबा सिद्दिकीच्या हत्येप्रकरणी पुढे येत आहे, त्याच लॉरेन्स टोळीने सलमान खानला जीवे मारण्याची धमकीही दिली आहे.

राष्ट्रवादीचे नेते प्रफुल्ल पटेल कूपर रुग्णालयात पोहोचले

राष्ट्रवादीचे नेते प्रफुल्ल पटेल कूपर रुग्णालयात पोहोचले. बाबा सिद्दीकी यांच्या मृतदेहाचे कूपर रुग्णालयातच पोस्टमार्टम होत आहे.

 प्रसिद्ध वकील उज्ज्वल निकम यांनी बाबा सिद्दीकी हत्या प्रकरणावर सांगितले की, मुंबईतील ही अत्यंत दुर्दैवी घटना आहे. गेल्या अनेक वर्षात मुंबईत राजकारण्याची हत्या झाल्याची ही पहिलीच घटना आहे. त्याला जीवे मारण्याच्या धमक्या आल्या होत्या, त्यामुळे या खुनाचा त्या धमक्यांशी काही संबंध आहे का, याचा तपास पोलीस करत आहेत.

'मुंबईत लहान मुलांपासून मोठ्या नेत्यांपर्यंत कोणीही सुरक्षित नाही'

बाबा सिद्दीकी यांच्या मृत्यूवर काँग्रेस नेते अतुल लोंढे म्हणाले की, 'बाबा सिद्दीकी यांची हत्या अत्यंत दुर्दैवी असून मुंबईत कायदा आणि सुव्यवस्था किती ढासळत चालली आहे, याचे हे उदाहरण आहे. मुंबईत लहान मुलांपासून ते मोठ्या नेत्यांपर्यंत कोणीही सुरक्षित नाही. या सरकारला सत्तेत राहण्याचा नैतिक अधिकार नाही.

बाबा सिद्दीकी हत्येप्रकरणी पोलिसांनी या कलमान्वये गुन्हा दाखल केला

बाबा सिद्दीकी हत्येप्रकरणी मुंबई गुन्हे शाखेने निर्मल नगर पोलिस ठाण्यात गुन्हा दाखल केला आहे. पोलिसांनी भारतीय न्यायिक संहितेच्या कलम 103(1), 109, 125 आणि 3(5) तसेच शस्त्रास्त्र कायद्याच्या कलम 3, 25, 5 आणि 27 आणि महाराष्ट्र पोलीस कायद्याच्या कलम 37 आणि 137 नुसार गुन्हा दाखल केला आहे. .

आरोपी दोन महिन्यांपासून बाबा सिद्दिकीची रेकी करत होते

प्राथमिक तपासानंतर मुंबई पोलिसांनी सांगितले की, आरोपी गुरमेल सिंग हा हरियाणाचा तर धर्मराज कश्यप हा उत्तर प्रदेशचा रहिवासी आहे. आरोपी बाबा सिद्दीकीआरोपी गेल्या दीड ते दोन महिन्यांपासून बाबा सिद्दीकी यांची रेकी करत होते आणि मुंबईत मुक्कामाला होते. तिसऱ्या आरोपीचा शोध सुरू असून, मुंबई गुन्हे शाखेची अनेक पथके तपासात व्यस्त आहेत. अटक करण्यात आलेल्या दोन्ही आरोपींची मुंबई गुन्हे शाखेचे वरिष्ठ अधिकारी चौकशी करत आहेत. पोलिसांनी सांगितले की, आरोपींना हत्येसाठी आधीच पैसे दिले गेले होते आणि काही दिवसांपूर्वी त्यांना शस्त्रे पुरवली गेली होती.

बाबा सिद्दीकी यांच्या पार्थिवावर रात्री 8.30 वाजता अंत्यसंस्कार करण्यात येणार आहेत

रविवारी संध्याकाळी ७ वाजता बाबा सिद्दीकी यांच्या वांद्रे पश्चिम येथील निवासस्थानी अंत्यसंस्कार करण्यात येणार असून रात्री ८.३० वाजता त्यांच्यावर अंत्यसंस्कार करण्यात येणार असल्याचे बाबा सिद्दीकी यांच्या कुटुंबीयांनी निवेदनाद्वारे कळवले आहे. बाबा सिद्दीकी यांच्यावर बडा कब्रिस्तानमध्ये अंत्यसंस्कार करण्यात येणार असल्याचे कुटुंबीयांनी सांगितले.

राष्ट्रवादीने सर्व कार्यक्रम रद्द केले

बाबा सिद्दीकी यांच्या निधनानंतर राष्ट्रवादीने आजचे सर्व कार्यक्रम रद्द केले आहेत. राष्ट्रवादी काँग्रेसने सोशल मीडिया पोस्टद्वारे लिहिले की, 'आमच्या पक्षाचे नेते बाबा सिद्दीकी यांच्या दुःखद निधनामुळे 13 ऑक्टोबर रोजी होणारे पक्षाचे सर्व कार्यक्रम रद्द करण्यात आले आहेत