प्रेयसीला पळवणाऱ्या व्यक्तीच्या मित्राचा खून

वेब टीम पुणे : प्रेयसीला पळवून नेणाऱ्या मित्राचा पत्ता माहीत करून घेण्यासाठी चौघांनी मिळून एका व्यक्तीचे अपहरण केले; तसेच त्याचा गळा आवळून खून केल्याचा प्रकार उघड झाला आहे. आरोपींनी पुरावा नष्ट करण्यासाठी मृतदेह पोत्यात बांधून मुळा नदीपात्रात फेकून दिला.

मावळ तालुक्यातील कान्हे फाटा येथे ३१ जुलै २०१९ रोजी ही घटना घडली होती. धीरज मायराम नागर असे खून झालेल्या व्यक्तीचे नाव आहे. या प्रकरणी सूरज उर्फ सोन्या अरविंद जगताप (वय ३५, रा. गांधीनगर झोपडपट्टी, देहूरोड), अरिफ सिद्दीक शेख (वय ३२, रा. पडवळनगर, थेरगाव), सागर सुरेश जगताप (वय ३०, रा. थेरगाव), चेतक नेपाळी यांच्याविरोधात गुन्हा दाखल करण्यात आला. याबाबत पोलिस उपनिरीक्षक विनोद शेंडकर यांनी सांगवी पोलिस ठाण्यात फिर्याद दिली.

आरोपी आरिफ शेख याच्या प्रेयसीला मयत धीरजचा मित्र दुर्गा साळवी याने पळवून नेले होते. त्यामुळे आरोपींनी दुर्गा साळवी याचा मुंबई येथील पत्ता माहिती करून घेण्यासाठी धीरज याचे ३१ जुलै २०१९ रोजी सायंकाळी सहा वाजता कान्हेगाव रेल्वे स्टेशनसमोरून अपहरण केले. त्यानंतर मुळा नदीपात्राजवळ वाकड येथे एका भंगाराच्या दुकानात आणून धीरजला मारहाण केली.

मृत धीरजची ओळख पटू नये यासाठी त्याचे सर्व कपडे काढून आरोपींनी मृतदेह एका पोत्यात घेलून मुळा नदीत टाकून दिला. हा प्रकार उघडकीस आल्यानंतर पोलिसांनी गुन्हा दाखल करून सूरज जगताप याला ताब्यात घेतले आहे. सांगवी पोलिसांनी हा गुन्हा वडगाव मावळ पोलिस ठाण्यात वर्ग केला आहे.